އެއްބުރުން

ޅެން: އަޙުމަދު ޔާމީން 

އެންމެ ބޮޑު ޕާޓީގެ ލީޑަރު އެއްބުރުން ގެންނާނަމޭ

އެންމެ މޮޅު ޕޮލިސީ އޮތީމާ ވެރިކަމަށް ގެންނާނަމޭ

 **********

ނިކަމެތިންނާ އަދި ފަޤީރުންނަށްޓަކާ ހަމްދަރުދުވާ

ނިކަމެތިންނާ މެދުގަ ވިސްނާ ރަންމުތެއް ހޯދާނަމޭ

ބިކަވެފާތިބި އެކަނިވެރި މައިންނަށް ދިރުން ގެނުވާނަމޭ

**********

ފަޅުގޮވާމުން އިޤުތިސޯދަށް ހެޔޮ ނަފާ ހޯދާނަމޭ

ފަޅުނުވާނޭ ހެން ރަށަށް ގިނަ ކުރިއެރުން ގެނުވާނަމޭ

ކަޅު އަނދިރި ބިރުވެރި ތިރީހަށް ފުރުސަތެއް ނުމެދޭނަމޭ

 **********

ހެޔޮކަމާ ހިތްހެޔޮކަމާ ދީލަތިކަމާ ދުރު ވިސްނުމުން

ހެޔޮހިތުން ވިސްނާނެ ލީޑަރު ދެން އަލުން ގެންނާނަމޭ

ހެޔޮ ލަފާ ޖީލެއް ބިނާ ކުރުމަށް ނަޝީދު ހޮވާނަމޭ

 **********

ވަޢުދުތައް މެކުހަށް ޖަހާނޭ ފުރުސަތެއް ހޯދާނަމޭ

ޤައުމުގާ ކުރި ބޮޑު ބަޣާވާތް އެއްބުރުން ނިންމާނަމޭ

ދަޢުލަތުގެ މިސްރާބު ހެޔޮކޮށް ވޯޓުލާ އަނބުރާނަމޭ

**********

އަންނިއޭ އަދު ޤައުމު އެދެނީ އެންމެ ހިތްތިރި ލީޑަރޭ

އަންނިއާ ލުތުފީގެ ހަތަރެއް އެއްބުރުން ގެންނާނަމޭ

 

އަންނި ކޮށްޓެވި މަގުގަ ހިނގަމުން ޤައުމު ކުރިއަރުވާނަމޭ

ކާޅު ބާޣީ ކުޑޭ

ޅެން: އަހުމަދު ޔާމީން

"ކާޅު ބާޣީ ކުޑޭ" ބެދި ހަފުސް ވެއްޖެ މަރު

ރާޅުލާ ކުރި ބަޣާވަތް ނިކަން ބަނދެ ކަމަރު..

ފާޅުގާ "އިބްނު ޤާރޫނު" ދިން ގިނަ ޑޮލަރު

ވާޅުލާ "ފިލި ކަޅޭ" ހިފިގޮތަށް އޮޅި މަލަރު..

*****************

ކޮށްލި ހުވަޔާއެކީ "އަންނި" ދެއްކީ ހުނަރު

ކޮށްފި އިޤްރާރު ކެރިގެން ޖަހާ ކަޅު ވަކަރު..

"ދުއްރަ" ޖެހި ނިކަމެތިވި ރައްޔިތުންނަށް ޕަވަރު

ބުއްދިކޮށް ޤައުމު މެކުހަށް ޖަހާލީ އެސޮރު...

*****************

ހައުދަ "އުސްމިންތަކަށް" ފެށިގޮތުން ބޮޑު ދަތުރު

ބައުރިޔާ ފެޅި ނުކިއްސަރުވެ މިސްރާބު ދުރު..

ނައުނަގާ ސޫރިވައިގާ ފިލަން ކުރި ދަތުރު

"ކައުނު ސީމެގް" ފަހާލީ ކުރަން ބުނެ ފިކުރު..

*****************

ވާމޮޅެއް ކަމުހިތާ ވީޑިއޯ ކޮށް ޚަބަރު

މާރޮނޑެއްހެން ހިފާ އޮޅުލަމުން ބުއި ޒަހަރު..

ގައުނަގާ "އެންގުރީބާރޑު" ބޮއެގެން ހަކުރު

ދަޢުލަތާ ވެރިކަމާ ފޭރިގަން ބޮޑު ތަކުރު..

*****************

ޤައުމު އިނދަޖައްސުވަން "ބޮޑު ގޮޅާ" ހެދި ސިހުރު

ޤައުމު ސުމަކުން ދަވާލީ "ހިލާލީ ބަބުރު"..

ލައުނަތޭ އަދު ކަލޯމެން "ޢަދާލަތު" މަކަރު

ހައުދަ ހުތުރޭ މި ދީނަށް "ބާޣާވަތް ޝަހަރު"..

*****************

ހުސް ދޮގާ ހީލަތާ ހެދި ތުނބުޅިލީ އެދުރު...

ފުސްބުރާ މޫނު ދެއްކެން ކުރީތީ ހުކުރު...

މުސްލިމުންނޭ ޙަޤީޤަތް ބަލާ ކޮށް ފިކުރު

ކުސްތަޅާ "ރޯނު ކަންނެލި އެދުރު" ވީ ކުފުރު..

*****************

=ނިމުނީ=

އެކަނިވީމާ

ޅެން: އަޙުމަދު ޔާމީން

ރާގު: ޕެރިސް އިވްނިންގ ކަރުގާވާ...

ހިތާ ހަށިގަނޑު ދެތަން ކޮށްފާ ، ފަނާކޮށް ހިތް ޒަޚަމް ކޮށްފާ

މިތާ ދުނިޔޭގެ ފަސްގަނޑުގާ ، ކަލާ ދިޔައީ އެކަނި ކޮށްފާ

********************

އެރޭދިން ސަނދުރަވީ އަލިކަން އުޖާލާ މޫނު ކޮށްލީމާ

އެރޭ ނިޔަނެތި ސަމާސާގާ ދެމީހުން އަތު ގުޅާލީމާ

އެރޭ ދުށް ލޯބި ހުވަފެންތައް އޮޔާ އެކުގާ އޮބާލީމާ

********************

ޔަގީނޭ މާމަލުގެ ރާނީ ކަމަށް ހިތުގާ ފަވާލީމާ

ހަގީގީ ރީތި ކަން ފެނިފާ ތަރިރުހަނދު އިސް ޖަހާލީމާ

ޔަގީނޭ ޝާއިރުން މޮޔަވާނެއޭ މޫނަށް ބާލާލީމާ

********************

އެރޭ އުފަލުން އެމެހެފިލްގާ ތަރާނާ ޔާރު އިއްވީމާ

މެރޭހިނދު ލޯ އެމަންޒަރުތައް ތަސައްލީއެއް ކަމަށްވީމާ

 ކެރޭނޭހޭ އެދެން އިޝްޤަށް ޒުވާނާ ބޭވަފާވީމާ

********************

ވިލާ ރަތްލާ މަނާޒިރުގާ އަތާ އަތް ޖޯޑު ކޮށްލީމާ

ހިލާ ދެގޮތެއް ނުވާނޭ ބުނެ އެތައް ވައުދެއް އުވާލީމާ

ފިލާ އޮވެ ހިތުތެރޭ ރަނިކަން ކަލާ އުފަލުންމެ ކޮށްލީމާ

********************

މިއީ ލޯބީގެ ފޮނިމޭވާ ކަމަށް ޔާރާ ބުނެފަ ވީމާ

މިއީ އަދު އަޅުގެ ތަޤުދީރޭ ކަލާ ބުނެދިން ހަނދާން ވީމާ

މިއީ ރަޙުމަތްކަމަށް ވެވިދާނެހޭ ދުނިޔޭން އެކަނިވީމާ